AMD 公開 FSR Redstone AI 光線再生＋畫面加速技術直逼 NVIDIA
2025-05-21 5346
AMD 終於出招！早前官方首次公開旗下升級版超解像技術 FSR 4「Redstone」開發進度，預計將於今年下半年正式登場。全新 Redstone 不單加入 AI 機器學習，更帶來光線再生與神經輻射快取等全新功能，明顯係針對 NVIDIA 嘅技術「打正旗號」追趕！
三大升級技術曝光 畫面質素或大躍進
Redstone 將會新增三項核心功能，包括「AI 驅動影格生成」、「光線再生（Ray Regeneration）」同「神經輻射快取（Neural Radiance Caching）」。當中最受玩家期待嘅，莫過於 AI 影格生成，等同加快畫面流暢度之餘又唔犧牲質素，對現時遊戲效能絕對係一大助力。
至於「光線再生」方面，就係 AMD 自家版本「Ray Reconstruction」，主要用 AI 去進行去雜訊處理，取代現時傳統光追 Denoiser，令整體光影效果更自然、更有層次。如果效果真如官方所講，畫質上將會有明顯提升。
Path Tracing 加速器？AI 幫手算光線更快更靚
另一大亮點「神經輻射快取」功能，專為支援 Path Tracing 遊戲而設。傳統 Path Tracing 要追蹤每條光線相當耗資源，Redstone 用 AI 模型代替實時運算，只需記錄少量光線樣本，就可以大幅減少 GPU 負擔之餘又保住畫面真實感，呢個技術對於想喺高畫質下玩大作嘅機迷嚟講，絕對係福音！
今次 Redstone 的出現，唔單止代表 FSR 技術正式踏入 AI 時代，更意味住 AMD 終於有力應對 NVIDIA DLSS 嘅壓力。RX 9070 同 RX 9070 XT 成功或多或少推動到今次更新，未來遊戲界勢將有排精彩過招！
