《壹獄》IIB版後日出籠！張建聲「龜頭魚」鈴聲嚇fans！

為答謝粉絲支持，導演孫立基聯同王宗堯、張建聲、蔡瀚億 (BabyJohn)、黃光亮、陳奐仁、盧惠光、林芊妤 (Coffee)、崔碧珈、張松枝和趙永洪等，於過去四日馬不停蹄先後前往港九多間戲院謝票，並向現場觀眾大派海報及自由selfie，氣氛勁high。 

《壹》片現時播映的雖是三級版本，但上畫以來各界口碑好評如潮，為令更多不同層面的觀眾可以入場欣賞這部誠意十足的本土創作，電影公司特別炮製一個IIB版，並於大後日(6月4日)正式推出，屆時便可讓觀眾有多一個選擇。

片中扮演兇悍監躉「呂文積」的張建聲，為配合角色增肥60磅，近期減磅成功兼變成大隻仔的張建聲每次謝票出場，都令觀眾嘩嘩聲，難以相信死肥仔身形大縮水，對其演出大為加分。為回饋觀眾，張建聲在facebook「吹雞」，只要觀眾影低飛尾post再pm張建聲，「阿積」就會私人錄段「起身啦，龜頭魚」醒你作為鈴聲，務求「嚇都嚇醒你，晨早起身必備良藥」，豈料post一出，他在一日之內竟然接獲超過200名觀眾pm。

其實龜頭魚的起源，始於「阿積」和扮「于日辰」的王宗堯結怨同倉後，「阿積」例寸「于日辰」係「龜頭魚」，張建聲說：「我問過原作者小姓奴，原來佢寫嘅時候覺得于日辰個于同龜頭魚個魚嘅諧音好撞，至於龜頭大家明白啦，我再喺戲入面作咗調整，結果個個都鍾意，有好多睇完部戲嘅人特登pm我，可唔可以再叫多次『龜頭魚』等佢哋諗番戲入面嘅恐怖感。我開心架，佢哋喜歡呂文積呢個角色，因為做奸角有個難度，一定要令人討厭我同憎恨我，再加上令佢哋恐懼，之後番出嚟佢哋幾懷念角色，都pm私信我點解個角色咁快死，好想睇吓佢點樣再嚇吓于日辰，呢個角色真係幾好，我自己非常滿意，好多謝高登巴絲同所有入場觀眾對呢個角色咁有感覺。」 

男神王宗堯連日謝票都掃場，被fans圍到冇位企近乎咪腳尖，雖則帶病但依然心情積奮，「我見到有好多觀眾同口碑都係非常正面，其實我哋常都會提早15分鐘竄入戲院，偷偷睇吓觀眾反應，現場反應都好好，而且又俾好多掌聲我哋，留低同我哋影相，亦都非常支持，會share去唔同社交平台，謝票係非常之開心同感恩嘅事。」Coffee則說：「我仲以為自己好乞人憎，但經過呢幾日謝票實戰，發覺都有好多人鍾意自己，我係愈謝愈開心。我知而家票房成績幾好，但沒有更好，只有最好，我仲要加油，再有謝票都會盡量支持。」