GameApps Logo

如月冰的宅指揮部第二回:淺談入宅作

2018-08-31 841
大家好!又係我 Gameapps.HK 小編如月冰,終於又捱到月尾出糧,上個月課金課左個井差啲飯都無錢開。年輕人,有咩驅使你每星期係度廢噏?係愛?定係責任?係窮呀!DLKH!鬼叫我無 10 萬蚊做生日禮物咩...

今個星期出唔少新GAME,例如唔少人既童年回憶,冨樫大叔既著名作品《幽遊白書》既新手遊:https://www.gameapps.hk/news/29653

鐘意玩食雞類既朋友可以試下呢隻題材比較新穎既海底食雞:https://www.gameapps.hk/news/29652

然後 9月尾又有任記同Cygames聯合開發既大作《Dragalia Lost ~失落的龍絆~ 》:https://www.gameapps.hk/news/29694

今個 9月包你唔會悶!


今日想講下"入宅作",自認宅男既大家相信都總會有一套作品係令你會跌落宅界呢個深坑嘅,而小編我既入宅作相信唔少人都會聽過,就係《Fate》系列嘅第一套電視動畫《Fate/stay night》。呢套動畫播嘅時候我仲讀緊中學,中學時期因為我比較幼稚,性格又內向,所以係班上係被欺凌嘅對象,亦無咩朋友,當時二次元真係拯救左我。

《Fate/stay night》呢套作品其實係隔離班一個朋友介紹比我,估唔到我一睇就上癮,坦白講小編我其實無接觸過原著遊戲 (原著係 PC 平台十八禁文字冒險遊戲),不過完全被作品嘅世界觀吸引,7 名魔術師御主同被召喚出黎嘅 7 名從者進行名為「聖杯戰爭」嘅戰鬥,最有趣既地方係作品以現代背景,但召喚出黎嘅從者大多都係以歷史或者傳說中實際存在的英雄、名人,而且 7 名被召喚嘅從者都有不同職階同特性,令呢場緊張刺激既聖杯戰爭更增添色彩。

而且騎士王 Saber 亦係我第一個好鐘意嘅動畫角色,背負住不列顛整個國家命運嘅呢位少女,非常冷酷而且對聖杯極度執著,不過經過與士郎一齊戰鬥同相處,漸漸流露出少女應有嘅笑容同情感,我第一隻買嘅 Figure 亦都係私服 Saber。

所以《Fate/stay night》呢套作品除左係我嘅入坑作,仲陪伴左我渡過左中學既人生,不過《Fate/stay night》已經係 2006 年嘅作品,而家要睇番都唔係咁易,如果對《Fate》作品有興趣嘅朋友不訪睇下比較近期嘅《Fate/stay night》前傳《Fate/Zero》同埋另一名女主角遠坂凜路線嘅《Fate/stay night [Unlimited Blade Works]》,兩部都係非常值得睇嘅作品!

今次介紹講到呢到,大家既入宅作品又係邊套呢?歡迎大家分享一下!下星期再同大家講下宅野!


最新評論

翻譯本站

遊戲APK下載搜尋

訂閱YOUTUBE頻道

廣告贊助
手機版 | 聯絡我們
© GameApps.HK 香港手機遊戲網 2013-2018