如月冰的宅指揮部第九回：齊齊做矮人變身掘礦高手

病到九彩既小編

今日同大家介紹一隻小編最近同朋友玩緊既 GAME，呢隻 GAME 由推出過網上熱話之作《模擬山羊》既公司 Coffee Stain 製作，名稱叫《Deep Rock Galactic》，其實唔算新 GAME，係今年 2月28 推出，主打 4 人合作打怪尋寶，絕對適合同朋友成班一齊開 Mic 玩！

《Deep Rock Galactic》中玩家扮演 4 名不同職業既矮人，透過在不同星球尋找珍貴礦物，不斷升級裝備和技能。遊戲中更設有多種任務比玩家選擇挑戰，而且相當講求玩家合作性，最重要係遊戲支援繁體中文，對我呢類英文苦手既人黎講真係福音。

遊戲中四種職業分別係工程師、機槍手、鑽頭工同偵察兵。

工程師主打據點防守同輔助，擁有兩座設置型機槍塔增強防守火力，有一把平台槍可以在牆邊建造一個地台方便隊友上落。

機槍手擁有四個職業中最強火力既格靈機槍，隊伍中既主要火力來源，擁有可以設置於兩點自由進行上落的吊索。

鑽頭工擁有雙鑽頭，任何地方都可以快速鑽開，絕對係隊伍中既鑽探高手、開路神器，武器不多，只有一把可持續造成傷害及建立火牆既火焰噴射器和一把低傷害的小型手槍。

偵察兵為開路要員，因為遊戲只會係洞穴中探險，所以全程都無日光，只靠玩家身上既照明彈，不過其他職業照明彈光度不高而且時間有限，不過偵察兵既照明槍可以射在牆上，為隊伍提供大範圍及長時間照明，而且擁有抓勾槍可以飛至任何地方，機動性最高。

另外，遊戲最大特色就係 100 % 可破壞環境及無限隨機生成地圖系統，遊戲內既所有物品都可以用十字鎬破壞，玩家可以自行掘出適合地形方便探索。而且每次進入關卡既地圖都會隨機生成，所以 100 % 唔會重覆，耐玩性相當高！

遊戲過程好簡單，進入洞穴挖掘所有資源，達成主要任務目標，就可以呼叫逃生艙離開，不過逃生艙會係地圖隨機降落，而且逃生時間只有 5 分鐘，雖然幫你收集礦物既礦螺會為你指引逃生路徑，不過都要小心唔好迷路，而且會不過出現怪物阻礙玩家，所以逃走過程都非常刺激！

仲有遊戲內會定時出現出現一大堆蟲群，就好似《Left 4 Dead》既喪屍來襲一樣，如果玩家唔合作一齊對抗，分分鐘隨時滅團！而且遊戲內彈藥有限，要依靠掘取硝團礦物召喚補給艙進行補給，如果地圖上硝團掘完，玩家就要坐以待斃！所以記得經常留意彈藥消耗，適當時候就撤離，千其唔好拖得太耐！

呢隻 GAME 畫面質素唔高，仲有D多邊形風格，角色又只有 4 個肥矮仔，不過勝在耐玩性高、毒性強，而且定價唔貴，遊戲亦有 Keep 住更新，快D call 埋班 FD 一齊掘礦啦！

如月冰

Gameapps.hk 小編，重度打機、動漫迷+聲優宅，較鐘意睇萌系、輕鬆、百合番，手機、電腦、PS4遊戲都有涉獵，主玩《FGO》、《少女前線》、《MLTD》、《公主連結R》。

在 Google 上關注我們 加入我們