為了提升服務質素,我們會使用Cookie或其他類似技術來改善使用者的閱讀體驗。如想了解更多請到這裡>。如果接受請點確認按鈕進入網站。
話說上個月去左轉日本,雖然遲左少少,今期分享下果次去過既一間合作連動 CAFE,身為動漫大國既日本,除左有大量女僕 CAFE 之外,亦有相當多主題合作 CAFE,定期會與唔同既動漫、遊戲作品合作連動,特別既合作餐單同週邊。
今次我去左秋葉原 Animate Cafe,當時正好同我有玩既手機遊戲《少女前線》日版《ドールズフロントライン》做緊合作連動,一入店既時候就發生件趣事,入店第一時間當然同店員講幾多位,而且我先行預約左,於是就比個人資料等店員處理,大家好自然用日文對答,當店員問我拎身份證明既時候,我就出示自己既護照。
突然店員用廣東話同我講「咦,原來你係香港人」,我當場呆左一呆Σ(゚д゚),原來呢位店員係香港留學生,估唔到係日本都遇到遊客以外既香港人,同佢講左兩句之後我就同同行既朋友入座。店內有相當多裝飾,遊戲角色Q版造型紙牌,等身大日版限定角色「一OO式」CAFE特別造型立牌等等。
今次我點左一OO式和風意粉、G11班戟、維爾德Mk II冰茶,同行既朋友亦點左一杯Kar98k 梳打。呢類 Cafe 其實食氣氛多過食好野,所以本身對食物品質無咩大期望,不過肉醬墨汁意粉意外唔錯,不過份量略少,所以加點左一個G11班戟,就飽到上心口....唯一可惜飲品冰茶非常淡,不過整體質素算唔錯。
不過今次合作週邊略缺誠意,相當多採用普通立繪圖,唯一一款「一OO式」CAFE特別造型迷你立牌亦已經完賣,小編為減少旅費支出,所以最後無買週邊,不過合作 CAFE 特別之處係點飲品或食品都會送一個合作杯墊,今次抽中左「一OO式」、「G11」、「春田」、「Kar98k」,同我點既食品相當接近,而且無重覆已經算賺左。(*´▽`*)
如月冰
Gameapps.hk 小編,重度打機、動漫迷+聲優宅,較鐘意睇萌系、輕鬆、百合番,手機、電腦、PS4遊戲都有涉獵,主玩《FGO》、《少女前線》、《MLTD》、《公主連結R》。