GameApps Logo

如月冰的宅指揮部第十七回:夢想、團結、家族

2018-12-14 831
大家好!又到如月冰宅指揮部既時間,我係 Gameapps.hk 既小編之一如月冰,下星期就到聖誕,講到聖誕呢個節日,現充既慶祝方法就唔岩我呢啲宅宅架啦,聖誕就緊係打聖誕活動同抽聖誕限定卡既時候!小編忽然歐洲 40 抽就入手左新角「尻槍」,仲入手埋鐵拳聖女同南丁格爾姐,真係年尾一次過用晒道氣,希望無事崖到過年,出街唔好比車撞。

大屁屁寶具!

今次想同大家分享小編一套非常鐘意既作品《偶像大師》,相信唔少人都聽過呢部作品既名,《偶像大師》最先出現係 2005 年既街機遊戲,由最先既 10 人直到後期 定為 13 人。2011 年正式播映電視動畫,雖然動畫已經有相當歷史,不過魅力依然不變。

《偶像大師》動畫以一個相當特別既方式作開頭,故事講述一個新入職的製作人,要帶領偶像向夢想進發,而第一步就係要認識自己既擔當偶像,因此動畫第一集全程以第一身拍攝型式,追蹤每一位偶像動態,同時向觀眾介紹每一位角色。

之後就以單元劇方式以一位偶像為主角,講述偶像工作流程細節,再令觀眾更深入了解每一位偶像角色背景、性格、特質等等。因為《偶像大師》背景 765 事務所只係一間細小既事務所,沒有名氣、資金等等前題下,偶像們就只有依靠自身努力,一步一步獲得知名度,向夢想進發。

當然偶像工作並唔係一帆風順,動畫中角色都會遇到自己不擅長既工作,不過放棄並唔係解決既方法,動畫中表現出面對自己缺點應該勇於面對、努力克服,自己先會有所成長,而在偶像後面作出支持既,正正就是製作人。

另外,動畫更帶出一個非常重要既訊息「團結」,要舞台演出成功,一個人既力量係做唔到, 765 事務所既 13 位偶像除左互相係競爭對手之外,亦係最重要既同伴,而《偶像大師》完美表達出呢個主題。「ひとりでは出来ないこと」、「仲間となら出来ること」,「一個人做不到的事」、「有同伴就可以做到了」,故事中偶像會遇到不同既突發事件,有時單靠一個人力量無法解決,而呢個時候就要同伴幫忙。

當中最令我感動既係小編最喜歡既角色 如月千早,因為小時候弟弟既死而形成心理陰影,唱歌就是一切既千早再次唱不出聲,演唱會亦以自己既意願強行登台,不過上台後依然唱不出聲,最後所有同伴都上台幫助,一齊唱支持佢,令千早最後克服陰影,呢一幕小編每一次睇都會因感動而哭,亦令「約束」成為小編最愛既一首歌。

《偶像大師》動畫並不只係一部講述少女追尋偶像夢想,只睇佢地唱歌跳舞既動畫,本作要帶出既主題係不要放棄「夢想」、勇於克服「困難」、「團結」相信同伴,所以《偶像大師》帶到好多感動比我,765 事務所對我黎講,係一個互相支持既家庭,所以過左咁多年,我依然深愛《偶像大師》呢部作品。

如月冰

Gameapps.hk 小編,重度打機、動漫迷+聲優宅,較鐘意睇萌系、輕鬆、百合番,手機、電腦、PS4遊戲都有涉獵,主玩《FGO》、《少女前線》、《MLTD》、《公主連結R》。

最新評論

翻譯本站

遊戲APK下載搜尋

訂閱YOUTUBE頻道

廣告贊助
手機版 | 聯絡我們
© GameApps.HK 香港手機遊戲網 2013-2019