GameApps.hk 香港手機遊戲網

如月冰的宅指揮部第四回:書信更能道出說不出的情感

icon
大家好,又到每星期一回既宅指揮部,我係 Gameapps.HK 小編如月冰,今個週末颱風「山竹」吹襲香港,聽聞呢個颱風仲勁過吹襲日本關西果個,雖然有機會減弱,不過大家都係乖乖地留係屋企打機唔好出門啦,安全至上。

最近《偶像大師 灰姑娘女孩 星光舞台》3 週年新加左AR影相功能,身為 P (Producer)既我緊係即刻試玩下,担當偶像好似走出左現實一樣,真係感嘆科技既進步,呢個肯定係人類滅絕計劃陰謀既第一步!

今次同大家介紹既作品係《紫羅蘭永恆花園》,大家聽到呢套作品既名第一時間可能覺得好似少女戀愛漫畫,其實作品名稱係出自本作女主角「薇爾莉特·艾佛加登」(Violet Evergarden),係由曉佳奈創作既輕小說作品,出名作畫品質極高既動畫公司「京都動畫」製作,亦係自京都動畫大獎舉辦以來,唯一獲得大賞獎作品!

《紫羅蘭永恆花園》背景有濃厚既歐洲風格色彩,講述女主角薇爾莉特·艾佛加登係一個生於大戰時期的一名少女,年紀輕輕已經有很強既戰鬥力,亦被軍隊視為「武器」利用,不過收留佢既「基爾伯特」少校反而視佢為親人般既存在。

大戰過後,係戰爭中失去左雙手既薇爾莉特裝上了義肢,但因為成長既背景關係,薇爾莉特對戰場以外既事一無所知,大戰完結以及自己最重要既基爾伯特少校下落不明,令佢十分迷茫,甚至一度懷疑自己既生存價值。而被托照顧薇爾莉特既基爾伯特好友「克勞迪亞」係戰後開設 C·H 郵政公司,亦履行承諾受僱薇爾莉特到自家公司工作。

通過一輪摸索後,薇爾莉特對稱為「自動手記人偶」既工作感到興趣,「自動手記人偶」意思係代筆員,專門幫助客人將思念和感情化成文字,寫入書信當中。令薇爾莉特對自動手記人偶呢個職業有興趣既原因係對自己最重要既少校係大戰失蹤前,對佢講左「愛」呢個字,而薇爾莉特就為左了解何謂「愛」而成為人偶。

成為人偶既薇爾莉特係工作過程接觸各種不同既委託人,有人為愛情而煩惱、有人想對自己既至親表達心中感受,卻又講不出口。「人類就係口是心非既生物」,通過人偶既工作,薇爾莉特開始逐漸理解人類既感情,將人類複雜既情感、思念化作一封封信件送到對方既心裡。

《紫羅蘭永恆花園》動畫入面每個委託人都有自己既故事,而且描寫得非常之好,人與人之間感情既描寫非常細膩,每個故事都睇到賺人熱淚,作品感染力之高,小編都睇到喊左好多次。雖然以神作去形容《紫羅蘭永恆花園》依然有保留之處,不過作為一部描寫人類感情既單元劇,本作無疑係成功既。現代人個個都拎手機 Whatapps、微信,如果有藏在心裡說不出口既情感,何不試下化作書信,將重要既說話傳達出去。


今次講到呢到,記得小心颱風,留係屋企,下星期繼續講!





Advertisement
廣告贊助
Follow Us

  人氣#TAG

遊戲APK下載搜尋

手機版 | 聯絡我們
© GameApps.HK 香港手機遊戲網 2013-2024