GameApps Logo

如月冰的宅指揮部第五回:颱風山竹

2018-09-21 1093
大家好,我係 Gameapp.hk 小編如月冰,每星期既宅指揮部又黎啦!上星期香港經歷颱風山竹吹襲,各地受災嚴重,小編屋企都不能倖免,屋企窗邊嚴重入水,滲透成個窗台。雖然已經過左接近一星期,不過周圍都仲係未清理既塌樹,辛苦災後清理既人士。

颱風當日早上 10 點左右我就被颱風嘈醒左,窗外太嘈想訓又訓唔返,之後發現窗邊有水,仲越黎越多,我就發現大風大雨導致入水,不過當我發現時幾乎已經浸滿成個窗台,好彩我有層架置放 Figure 手辦,唔係就麻煩了...不過我啲放近窗邊既同人本、海報就不幸報銷。

而且雨水更滲漏到窗台下面,因為附近有電制太危險,所以熄左電源。然後我就一直重覆抹乾雨水、扭乾毛巾、抹乾雨水既動作 3、4 小時,扭毛巾扭到手都痛....

放底層既黏土人盒都全濕了...

到處都仲可以見到未清理好已經枯萎既塌樹,大家經過既時候都要小心斷枝掉落。

今日講吓一隻最近玩緊既遊戲《異國探險隊》(Strange Brigade),呢隻遊戲以 1930 年代埃及為背景,玩家扮演 4 位有不同技巧既英雄,對抗復活既巫后同亡靈軍團,同時探索古墓及尋找寶藏。遊戲有啲似似《Left 4 Dead》同《Biohazard 5》既混合,遊戲強調合作遊玩,當然玩家都可以單人挑戰,而且收集元素相當多,一個關卡好多時尋找隱藏既收集品花上最少一至兩小時。

遊戲中既怪物唔係太家熟識既喪屍,而係比較新穎既木乃伊,除左木乃伊等較低級敵人外,仲有拎長槍、盾牌、火把等武器既靈廟守衛、毒蠍、強力既牛頭人等。敵人種類繁多,玩落都幾新鮮。而且遊戲關卡中,都有 3 至 4 個地方需要玩家在海量的怪物中死守一段時間先可以繼續前進,享受瘋狂殺怪既快感。

除此之外,遊戲另一重點就係解謎,遊戲中設有非常多既解謎元素,有部分係主線故事所需,有部分係開啟收藏財寶既寶物庫閘門,解謎其實係多種小遊戲,包括記憶圖案順序、將兩邊蛇型機關連接、記憶正確圖案等等,而且每次答案都會隨機生成,就算玩家已經知道解答方法都要重新尋找線索。

遊戲整體射擊感不錯,打怪都有感覺,不過整體難度不算高,就算小編與朋友二人挑戰最高難度和最大敵人數目都可以通關。而且遊戲中有很多不同陷阱供玩家使用,一口氣清除大量敵人,不過多人遊玩時小心誤傷隊友。不過遊戲關卡唔算太多,武器種類不多,主要分為機槍、散彈槍、步槍高中低級各一把,加上賺錢不難既前題下,小編玩左幾日幾乎已經拎到 PS4 白金獎盃,所以遊戲耐玩度不算高,相信有相當多既內容係付費 DLC 吧。

最新評論

翻譯本站

遊戲APK下載搜尋

訂閱YOUTUBE頻道

廣告贊助
手機版 | 聯絡我們
© GameApps.HK 香港手機遊戲網 2013-2018