GameApps Logo

如月冰的宅指揮部第六回:大家都只顧庫巴姬 別忘了血小板

2018-09-28 1663
大家好!又係我 Gameapp.hk 小編如月冰,黎到月尾又係準備出糧既時候,除此之外《偶像大師 百萬人演唱會!劇場時光》仲會係每個月既月尾出 Fes 限定角色抽卡池,今次竟然係偶像大師本家既彌生 X 伊織(やよいおり) CP池!而且仲送每日免費 10 連,簡直神營運!

免費 10 連中左 Fes 彌生!感謝營運!ありがサンキュー!


最近網上紅爆既「庫巴公主」同「鬼魂公主」等等,甚至出現「耀西公主」、「食人花公主」、「炮彈公主」多到數唔晒,呢個存在無限可能性既王冠相信仲有排玩,不過大家好似已經忘記左先前紅極一時既血小板,借今次機會就介紹下《工作細胞》呢套動畫。

《工作細胞》係由女漫畫家清水茜原創既漫畫,作者清水茜表示會畫《工作細胞》原因係妹妹正學習細胞相關知識,建議畫成漫畫就係很容易記得,於是就創作出《工作細胞》。

《工作細胞》簡單黎講就類似動畫版教育電視,全套動畫圍繞一個人身體內的細胞運作方式擬人化故事,動畫整體故事感不強,每集都以單元形式講解一種生理現象或病症。主角係一個會經常迷路,而且總會遇上細菌等突發事件既紅血球(AE3803),以及無時無刻都會出現保護佢既白血球(U-1146)。

動畫入面包含大量人體運作以及細胞相關知識,以一個類似大型工場既環境描述人體內部相當有趣,創作理念正面又有教育成份,但涉及既細胞知識其實相當深入,如果無學習過相關知識其實不易明白,因此每集都有相當多既解說(又可以聽到能登麻美子把聲)。

不過作者對每種細胞同人物設定之間非常講究,令觀眾可以投入世界觀之餘又覺得有趣,例如白血球可以游走身體各處消滅細菌,所以白血球(U-1146)經常係意想不到既地方突然出現,又或者單核球一旦離開血管會轉變成巨噬細胞等等。動畫中作者都會以各種方式還原現實細胞既情況。

《工作細胞》呢套作品有趣之餘又可以學到大量人體知識,令觀眾明白健康重要性,大家不仿花時間睇下,最重要係血小板真係好萌!最後送上血小板比大家摸下(用網頁版開會有萌死人音效),下星期再見!

摸摸血小板傳送門:https://platelets.fun/

最新評論

翻譯本站

遊戲APK下載搜尋

訂閱YOUTUBE頻道

廣告贊助
手機版 | 聯絡我們
© GameApps.HK 香港手機遊戲網 2013-2018