GameApps Logo

如月冰的宅指揮部第十六回:為夢想而戰的「舞台少女」

2018-12-07 803
大家好!又到每星期既宅指揮部,我係 Gameapp.hk 小編如月冰,最近既天氣涼涼地,真係好好訓_(:3 」∠ )_ (懶。最近 ViuTV 最新一集「晚吹 - 又要威 又要戴頭盔」節目講日本偶像追星,搵左 4 位日本偶像 FANS 上節目分享,主題幾有趣,小編都有感同身受既感覺,因為小編自己都係一個聲優歌手 FANS,每年都會飛好幾次日本,真係去秋葉原多過去信和。

今次介紹一套今年 7 月番動畫《少女☆歌劇Revue Starlight》(以下略稱《少女歌劇》),《少女歌劇》係由武士道、Nelke Planning 等公司共同開創既多媒體計劃,包括動畫、遊戲、音樂、舞台劇等等,動畫於 7 月放映、手機遊戲就隨接動畫完結於 9 月推出,第二次舞台劇亦於 12 月 22 日開演,香港戲院都有直播場上映,一系列宣傳活動攻勢係武士道一貫閃電戰作風。

《少女歌劇》故事講述主角愛城華戀同兒時好友神樂光,小時候因為一齊睇舞台劇「Starlight」,因而立志要一同踏上舞台。愛城華戀入讀聖翔音樂學園,而神樂光亦在英國留學後返回聖翔音樂學園,一同追尋舞台之道,成為舞台少女。

故事中有一個稱為 Revue 的選拔會,由一隻會說話既奇怪長頸鹿主持,舞台少女參加 Revue 選拔會就要以一個戰鬥方式演出一部舞台劇,成功將對手戰衣打掉者為勝,選拔會最終勝利者就可以站在舞台頂峰,獲得實現夢想資格,成為最閃耀既主角。

不過《少女歌劇》作品表達方式較為抽象,而且故事主軸以及選拔會既真相幾乎到第 7 話先曝光,前 6 話大部分時間用於角色描寫。甚至故事已經到一半,觀眾先知道選拔會中落選少女既命運,並不是一個單純以演技決定主角,而係一個賭上舞台少女生命與夢想既故事。本作故事完整性不差,以描述圍繞 8 名角色既舞台劇「Starlight」為起始再以改寫結局既「Starlight」為終結,首尾呼應連繫整部作品。

而且除左劇本外不得不讚本作劇情表達方式以及鏡頭運用,選拔會既戰鬥演出中加入大量舞台道具、燈光等演出,而且戰鬥唔係為生命而戰既死鬥,要如何在戰鬥中表現自己耀眼之處,比對手更加閃耀亮麗才是選拔會重點。加上歌劇中另一樣主要元素「歌」,令戰鬥演出不但華麗,觀眾亦可以在歌詞中感受到角色既意志與夢想。

如月冰

Gameapps.hk 小編,重度打機、動漫迷+聲優宅,較鐘意睇萌系、輕鬆、百合番,手機、電腦、PS4遊戲都有涉獵,主玩《FGO》、《少女前線》、《MLTD》、《公主連結R》。

最新評論

翻譯本站

遊戲APK下載搜尋

訂閱YOUTUBE頻道

廣告贊助
手機版 | 聯絡我們
© GameApps.HK 香港手機遊戲網 2013-2018