GameApps.hk 香港手機遊戲網

如月冰的宅指揮部第十八回:不只有萌萌的傲嬌助手 引人深思的神作《命運石之門》

icon
大家好,又係我 Gameapp.hk 小編如月冰,一到年尾聖誕新年就一大堆手機 GAME 活動,唔課金都課肝課到死,請大家珍惜銀包珍惜肝臟。話說《Red Dead Online》真係意外地悶,賺錢難都算,主線劇情關卡少,陌生人任務重複性高,加上打獵元素大減,動物皮屍除左賣之外無用,搞到遊戲性好低,玩完任務就放置了。

今個星期介紹一下上季播完新一季既動畫《命運石之門》,《命運石之門》原作係「妄想科學ADV系列」既文字遊戲,故事帶幻想與科學元素,圍繞男主角岡部倫太郎意外製造出一部可以將電子郵件發送到過去,並影響世界發展既時間機器。本作因為吸引既故事發展以及精彩劇情鋪排,第一季動畫係 2011 年播放後大受好評。

《命運石之門》第一季動畫係故事係成部作品既核心,而第二季《命運石之門 0》故事係接續第一季動畫之後,如果大家未睇過第一季,請唔好跳去睇《命運石之門 0》,因為包你百分百睇唔明。

《命運石之門》第一季動畫講述就讀東京電機大學既男主角岡部倫太郎與朋友橋田至,意外製造出一部可以將電子郵件發送到過去既時間機器「電話微波爐(暫名)」,加上岡部一次意外發送電子郵件到過去,而改變左世界既未來,故事就因為展開。

因為呢個電子郵件改變世界,招致岡部朋友椎名真由理死亡,倫太郎為左改變命運,嘗試多次利用時間機器將自己記憶送到過去,多次輪迴 2010 年 7月至 8 月期間時間,但都回避唔到真由理死亡既命運。擁有回到過去後依然保持記憶既倫太郎,經歷多次慘痛記憶後,發現世界線理論與世界因果關係,結果岡部只可以係青梅竹馬真由理與後來遇上並相愛既助手牧瀨紅莉栖中選擇一人,而另一人就要面對死亡既命運。

最新一季《命運石之門 0》就接續《命運石之門》第一季動畫,講述由真由理死亡既 α 世界線中,刪除所有影響世界既電子郵件而回到紅莉栖死亡既 β 世界線,不過呢個世界線亦存在各種陰謀,被命運折磨而失去鬥志既倫太郎,認為 β 世界線就係最好既結局,直至真由理說服倫太郎恢復鬥志找尋完美既結局「命運石之門」。

由於《命運石之門》劇情量同資訊量難以三言兩語可以講得晒,所以小編都唔係到講太多同劇透,不過作品結合科學理論、時間輪迴、世界線概念,主角們仲要面對世界命運、與政府對抗等等多種厭力要素,劇情內容非常豐富。不過本作頭段部分,觀眾未深入理解故事本質之前,其實幾難明。不過經前段大量伏筆鋪設,加上後期大家深入理解故事同角色之後,後段爆發性既展開非常精彩,難怪稱得上為神作。所以如果大家未睇既話,小編非常建議大家補完呢一部作品。

如月冰

Gameapps.hk 小編,重度打機、動漫迷+聲優宅,較鐘意睇萌系、輕鬆、百合番,手機、電腦、PS4遊戲都有涉獵,主玩《FGO》、《少女前線》、《MLTD》、《公主連結R》。

─完─





Advertisement
廣告贊助
Follow Us

  人氣#TAG

遊戲APK下載搜尋

手機版 | 聯絡我們
© GameApps.HK 香港手機遊戲網 2013-2024