GameApps Logo

如月冰的宅指揮部第二十三回:設定豐富 劇情過急 美中不足的百合作

2019-02-15 1192
大家好,好耐無見啦!最近因為新年、請假遠征之類,呢個專欄休息左好幾期。大家新年有無去邊玩呢?定係安坐家中打飛機、射喪屍呢?最近開左唔少手遊坑,買左 Bio Re:2 都未開,《ACE COMBAT 7》同《勇者戰機少女》都係打到一半。

我既心情只有一張圖形容到...

最近一次過開左三隻手遊坑

今次同大家介紹一套唔算好出色,亦唔算出名既作品,不過如果你鐘意睇少女同萌系都可以一看,忍者特工題材+萌系美少女作品《月影特工》(Release The Spyce),本作既設定相當唔錯,故事劇情亦相當王道,只可惜劇情分配上較為失色,令本片未受關注。

《月影特工》故事講述虛構城市空崎市之中,有一個打擊罪犯既秘密組織「月影」,充滿正義感既主角源桃,意外捲入罪案之中,被「月影」解救的源桃為了貫徹自己既正義同改變自己面對罪惡既膽小個性,決定加入「月影」。

「月影」設定上係混合現代特工與古代忍者元素既組織,再加上戰鬥時使用特製香料,可以短時間提升身體機能既設定,其實可以有相當大發揮空間,可惜製作組將相當多劇情部分集中於人物描寫、師徒關係上既情感之中,所以如果想睇なもり人設既美少女萌系動畫,本片相當適合,以戰鬥類動畫黎睇就只會令你失望。

動畫初期大部分時間講述主角源桃加入月影,由一竅不通、任務中因為急於立功而頻頻出錯、缺乏自信心既新手,逐漸變成可以不再依賴師父雪、獨當一面、為自己正義而戰既出色特工,主角心境成長描寫用左相當大編幅,雖然有助觀眾了解主角性格,不過略然長編。中段劇情集中於「楓」、「命」,「五惠」、「初芽」另外兩對師徒既關係情感,想被師父稱讚、想令師父認為自己可以獨當一面,相信自己等等情感,盡顯戰鬥劇情都變成配菜。

而且動畫尾後劇情過急,背叛陰謀、計略策謀係短短兩集之間大爆發,容易令觀眾混亂。而且由《結城友奈是勇者》既タカヒロ擔任企劃原案,大家可能會期待有相當黑暗既劇情展開,不過最後卻特意營造大團圓結局。

雖然全篇都好似踩緊呢部作品,其實本作都有唔少值得睇之處,首先人物設定豐富,每位角色個性獨特,令觀眾容易投入記得每位角色,角色關係與百合情節都可以滿足不少觀眾。故事設定、背景設計不馬虎,由學習特工既技能細節,以香料為能力解放既誘因,甚至年齡會限制香料使用既效果等等。其實睇得出劇組下左相當功夫,只可惜劇情分配與集數不足,令本片美中不足。

如月冰

Gameapps.hk 小編,重度打機、動漫迷+聲優宅,較鐘意睇萌系、輕鬆、百合番,手機、電腦、PS4遊戲都有涉獵,主玩《FGO》、《少女前線》、《MLTD》、《公主連結R》。

─完─

最新評論

翻譯本站

遊戲APK下載搜尋

訂閱YOUTUBE頻道

廣告贊助
手機版 | 聯絡我們
© GameApps.HK 香港手機遊戲網 2013-2019