張建聲聞「舅父」登台被打震驚！吳志雄澄清：埋到身俾我打死咗！

不過，大佬B今日就向大家報平安，澄清絕對冇事：「我都會被人打到？唔係呀？我健步如飛，泰拳幾十年，打到我都真係好有料啦！但係佢乜都打唔到，如果真係埋到我身，俾我打死咗啦！」昨晚在港的大佬B擦完大魚大肉後，今午又去嘆茶，全然不受傳言影響心情。

網上流傳兩條大佬B視頻，一條是他登台被擾掟咪，另一條是他在派出所講述情況，大佬B解釋當晚情況：「其實係fans熱情，我唱緊歌，跟住俾班人拉落去陪酒，我唱歌演出唔係陪酒，一班人衝上台係都拉要我飲，我掟埋咪囉，你想點樣呀？嗰啲地方你哋未見過，農村搭個棚就係酒吧，一大堆人喺度玩，係咁飲係咁飲，見到偶像出場就好興奮好激動，呢個係風氣，如果真係睇演唱唔會帶埋啤酒啦，佢唔係有心打我，係舉手有個動作，冇事，一啲都揩唔到我。」

至於派出所那條視頻，「大佬B」直認片中人是他，他亦確實有講過片中一番話，他笑說：「係我，(國語)『我們是香港的大演員，是吧？你們是當地的小混混，來打個明星，是不是打到個明星，你們的名字就響呢？』嗰個人捉咗去派出所啦，警察叫我認人，係佢，佢醉咗，但佢冇打到我，佢老婆同女同我道歉，咁我唔追究啦，希望第日飲少啲酒啦。」

大佬B在《壹獄》中飾演張建聲(Justin)舅父，Justin驚聞「舅父」被襲即刻嘩嘩聲：「邊個夠膽打大佬B？咁我都相信佢喺國內登台有時難免去啲比較複雜地方，會有危險性，但正如大佬B都澄清一切安好，可能係少少誤會，希望大佬B日後喺地內都小心啲，忍一時風平浪靜，退一步海闊天空。」