如月冰的宅指揮部第十回：戰爭的王道愛情故事 舊酒新瓶之作

FGO萬聖活動開始，小編入藉歐洲

今日講下小編最近拎左白金獎盃既遊戲《戰場女武神 4》，雖然呢隻GAME都出左半年，不過最近先有時間心機拎番出黎玩。

好坦白講，其實女武神 4 可以話係舊酒新瓶既作品，遊戲內大部分系統、UI、音效、甚至部分音樂都沿用第一集設計，就連遊戲故事都用番最人氣既第一集背景，可見 SEGA 絕對唔希望呢隻 10 週年作品失敗，進而選擇走最安全保守既路線。

而且眼見上集外傳《蒼藍革命之女武神》大改遊戲玩法系統，結果不論不類，劣評如測之後，出一隻舊酒新瓶之作，挽回系列人氣。雖然話係舊酒新瓶，不過作為第一集粉絲，見到女武神 4 採用相同系統設計的確相當感動，始終本作最特別既 BLiTZ 戰鬥系統係 10 年既今日依然有其魅力。

《戰場女武神 4》與第一集分別只在於加入擲彈兵一個兵種及一架裝甲車，整體上沒有太大進步，相信變化最大只有新增一架戰艦同船艦命令，遊戲畫面依舊沿用第一集既水彩畫風格，畫質上無太大突破，可以話係平隱取悅粉絲。

至於遊戲故事方面，雖然主角同為加利亞出身，不過今次由義勇軍改為聯邦軍背景，採用王道既同生共死而萌生出愛情，以及因戰爭而犧牲既王道劇情依然令人感動，不過比較可惜本作女武神主題唔夠突出，與敵方女武神對戰亦只有幾場，玩家一方更完全無機會操作女武神角色。最值得一讚係每個小隊中既角色都有各自背景，而且各有收錄相關斷章劇情，加強玩家對角色既歸屬感。

總括黎講，《戰場女武神 4》行左一條相當保守既路線，達至不失禮粉絲，又可以取悅新玩家既作品，以粉絲角度黎講尚可收貨，不過始終希望下一作可以有更多新突破。

如月冰

Gameapps.hk 小編，重度打機、動漫迷+聲優宅，較鐘意睇萌系、輕鬆、百合番，手機、電腦、PS4遊戲都有涉獵，主玩《FGO》、《少女前線》、《MLTD》、《公主連結R》。