GameApps Logo

【《西謊極落》原班人馬3年後重聚】蔡瀚億林盛斌化身《西遊》戰將 周柏豪張繼聰聲演唐僧悟空

2020-08-09 3940
原著本地漫畫家鄭健和之名作《西遊》,首部港漫改篇之粵語版 3D 動漫,一連 38 集已定於下周五 ( 14/8 ) 在網上點播平台 hmvod 的 facebook 免費首播頭兩集,之後逢星期五有新五集於 hmvod 上架;而電影版《再見悟空》則於 8 月 21 日隆重推出。

今次《西遊》動漫由電影《西謊極落:太爆‧太子‧太空艙》幕前原班人馬相隔三年後再度合體聲演,包括周柏豪聲演「唐三藏」、張繼聰聲演「孫悟空」、林盛斌 ( Bob ) 聲演「豬八戒」、蔡瀚億 ( BabyJohn ) 聲演新角色「白狼」;新加入的有聲演女主角「小羽」的鄧月平 ( Larine ),以及由張建聲聲演的奸角「帝釋天」。至於動漫《西遊》為全新故事,講述《西遊記》四師徒取西經後16年,一頭狼妖找到唐三藏,竟然重歷西天之路。而首條動漫宣傳片已於今日發佈 ( shorturl.at/ekxT5 )。


柏豪、Bob 及 BabyJohn 其實在《西謊》片尾的彩蛋中,曾拍過一場《西遊記》搞笑戲,今次他們雖然在不同日子為動漫《西遊》配音,未能碰頭,但得悉隔空合作亦感開心,柏豪笑說:「有諗如果一齊配就好啦,但技術上做唔到,依家行內好多工作都暫緩或者有啲取消咗,都真係好掛住啲老友,阿 Bob、呀聰,網上有傾偈,whatsapp互相問候,但見面真係好少,緣慳一面,希望疫情過後或者再見面一齊傾吓湊囡經。」

BabyJohn 亦說:「《西謊》時我扮過孫悟空,但亂咁玩吹吓水,我好記得嗰場戲係彩蛋,冇夾過,冇啦啦出嚟,大家亂咁講嘢,亂晒龍!今次好啲,唔係一齊配,一齊配我諗一集都唔知配唔配到。」

其實柏豪同《西遊記》特別有緣,除了在《西謊》彩蛋飾演「龍馬」( 唐僧的座騎白馬) 外,之前他又在內地電影《鬥戰勝佛之大聖之淚》飾演孫悟空,但是次聲演唐僧是另一種感覺,「由細到大對唐僧嘅想法係好靜、冇咩語氣,但今次唐僧係一反我哋印象,幾輕鬆同埋唔係以前認識嘅咁死板,都好多對白要配。」而且動漫唐僧仲好靚仔、大隻又打得,柏豪笑說:「係每個角色都畫得好有型,同埋我同阿聰都係健身,我哋都會對呢個動漫嘅身型有留意,佢哋 (漫畫)啲腹肌操得幾靚,孫悟空個手臂操到幾靚呀,所以阿聰做孫悟空一流,因為大家都知阿聰大隻,fit番;至於阿Bob就唔多講啦,哈哈...」

阿聰就表示,孫悟空是一個令演員愛不釋手的角色,因為這個人物性格多層次、反叛、好勁,又好重情義,所以悟空亦是他在《西遊記》中最鍾意的人物,問他會否覺得自己同悟空有相似之處?他說:「都有架,嗰種不羈、尊師重道我有,當然我冇佢法力高強,孫悟空係有一種傲氣,特別係大鬧天宮之前,因為你有好強能力先可以傲視一切,但呢點我冇,我唔覺得我有能力大鬧天宮,咁先好嘛,真實生活做唔到,做戲可以做過吓癮。」

此外,阿聰和柏豪配音當日,作者鄭健和更到場探班,並送上角色畫板贈予二人。

最新評論

遊戲APK下載搜尋

訂閱YOUTUBE頻道

手機版 | 聯絡我們
© GameApps.HK 香港手機遊戲網 2013-2020